போதுமடி மீனாட்சி

03 Sep 2026

முகப்பு  >  தமிழ்  >  வலைப்பதிவு

தெனவெடுத்த தோளிருக்கு
பகையறுத்த வாளிருக்கு
குலங்காக்கும் மன்னவனா
உலகாள மதியிருக்கு

காதலிச்ச நெனைப்பிருக்கு
கருவறையா இருந்திருக்கு
தேகந்தொட்ட நேரமெல்லாம்
கவிதைகளா உறைஞ்சிருக்கு

ஆத்துமணல் மேடிருக்கு
அழகான கூடிருக்கு
தாயவளத் தேடுமொரு
சின்னஞ்சிறு பேடிருக்கு

வேறென்ன வேணுமடி
மீனாட்சி உனக்கு ?
சொல்லிவிட்டு போயிருந்தா
போதுமடி எனக்கு !

நூலறுந்த காத்தாடி
மேடையில்லா கூத்தாடி
காடுள்ள மிருகத்துக்கு
காதலொரு சாக்காடி?

கொண்டவளும் கூடயில்ல
கூடிப்பேச யாருமில்ல
சொந்தமில்லா ஊருக்குள்ள
நிக்குதிந்த தேரு புள்ள

தன்னந்தனியாக நின்னு
தவிச்சிருந்த நாளுமுண்டு
போறப்பாதை தெரியாம
உடைஞ்சிருந்த நேரமுண்டு

காட்டருவி சாரலில
பூத்திருக்கும் பூவப்போல
பகடிக்கதை வாழ்க்கையில
மகளவள பாக்குறப்ப

அத்தனையும் மறக்குதடி
அடிமனசு பறக்குதடி
இப்பொழுதே வாழ்க்கையென
நிம்மதியாய் இருக்குதடி

போதுமடி மீனாட்சி,
இது -
போதுமடி மீனாட்சி !

பொருள் விளக்கம்:

• தெனவெடுத்த - தினவு + எடுத்த. தினவு என்பதற்கு போரில் வெற்றியை அடையும் “அடங்காத துடிப்பு” என்னும் அர்த்தம் கொள்ளவேண்டும்.
• பகையறுத்த - பகை + அறுத்த. பகைவரை போரில் அழித்த.
• பேடிருக்கு - பேடு + இருக்கு. பேடு என்றால் பெண்பறவை, இங்கு சிறு பெண்குழந்தையை குறிக்கிறது.
• காடுள்ள மிருகத்துக்கு - நினைவில் காடுள்ள மிருகம். காடும், வேட்டையும், இரத்தமும் நினைவில் இருக்கும் மிருகத்தை பழக்க முடியாது. இங்கு, காதலை வேட்டைக்களமாய் பயன்படுத்தும் மிருகத்தை குறிக்கிறது.
• பகடிக்கதை - பகடி + கதை. எல்லாரும் சிரிப்பதற்காக சொல்லப்படும் கதை. ஊரார் சிரித்து பரிகாசம் செய்யக்கூடிய ஒரு அவலமான வாழ்க்கையில் - என அர்த்தம் கொள்ளவும்.

முகப்பு  >  தமிழ்  >  வலைப்பதிவு